Ratana Sutta
Discourse on Jewels

1.       Yānīdha bhūtāni samāgatāni
          Bhummāni vā yāni va antalikkhe
          Sabbeva bhūta sumanā bhavantu!
          Atho pi sakkacca suṇantu bhāsitaṃ

2.       Tasmā hi bhūtā nisāmetha sabbe
          Mettam karotha mānusiyā pajāya
          Divā ca ratto ca haranti ye baliṃ
          Tasmā hi ne rakkhatha appamattā

3.       Yaṅkiñci vittaṃ idha vā huraṃ vā
          Saggesu vā yaṃ ratanaṃ paṇītaṃ
          Na no samaṃ atthi tathāgatena
          Idam pi Buddhe ratanaṃ paṇītaṃ
          Etena saccena suvatthi hotu!

4.       Khayaṃ virāgaṃ amataṃ paṇītaṃ
          Yadajjhagā sakyamunī samāhito
          Na tena dhammena samatthi kiñci
          Idam pi dhamme ratanaṃ paṇītaṃ
          Etena saccena suvatthi hotu!

5.       Yaṃ buddhasettho parivaṇṇayī suciṃ
          Samādhimānantarikaññamāhu
          Samādhinā tena samo na vijjati
          Idam pi dhamme ratanaṃ paṇītaṃ
          Etena saccena suvatthi hotu!

6.       Ye puggalā aṭṭha sataṃ pasatthā
          Cattāri etāni yugāni honti
          Te dakkhiṇeyya sugatassa sāvakā
           Etesu dinnāni mahapphalāni
           Idam pi saṅghe ratanaṃ paṇītaṃ
           Etena saccena suvatthi hotu!

7.       Ye suppayuttā manasā daḷhena
          Nikkāmino Gotamasāsanamhi
          Te pattipattā amataṃ vigayha
          Laddhā mudhā nibbutiṃ bhuñjamānā
          Idam pi saṅghe ratanaṃ paṇītaṃ
          Etena saccena suvatthi hotu!

8.       Yathindakhīlo paṭhaviṃ sito siyā
          Catubbhi vātebhi asampakampiyo
          Tathūpamaṃ sappurisaṃ vadāmi
          Yo ariyasaccāni avecca passati
          Idam pi saṅghe ratanaṃ paṇītaṃ
          Etena saccena suvatthi hotu!

9.       Ye ariya saccāni vibhāvayanti
          Gambhīrapaññena sudesitāni
          Kiñca pi to honti bhusappamattā
          Na to bhavaṃ aṭṭhamaṃ ādiyanti
          Idam pi saṅghe ratanaṃ paṇītaṃ
          Etena saccena suvatthi hotu!

10.     Sahāvassa dassanasampadāya
          Tayassu dhammā jahitā bhavanti
          Sakkayadiṭṭhi vicikicchitañ ca
          Silabbataṃ vā pi yadatthi kiñci
          Catūhapāyehi ca vippamutto
          Cha c’ābhiṭṭhānāni abhabbo kātum
          Idam pi saṅghe ratanaṃ paṇītaṃ
          Etena saccena suvatthi hotu!

11.     Kiñcā pi so kammaṃ karoti pāpakam
          Kayena vācā uda cetasā vā
          Abhabbo so tassa paticchādāya
          Abhabbatā diṭṭhapadassa vuttā
          Idam pi saṅghe ratanaṃ paṇītaṃ
          Etena saccena suvatthi hotu!

12.     Vanappagumbe yathā phussitagge
          Gimhānamāse paṭhamasmiṃ gimhe
          Tathūpamaṃ dhammavaraṃ adesayi
          Nibbānagāmiṃ paramaṃ hitāya
          Idam pi Buddhe ratanaṃ paṇītaṃ
          Etena saccena suvatthi hotu!

13.     Varo varaññu varado varāharo
          Annuttaro dhammavaraṃ adesayi
          Idam pi Buddhe ratanaṃ paṇītaṃ
          Etena saccena suvatthi hotu!

14.     Khīnaṃ purānaṃ navam natthi sambhavaṃ
          Virattacitta āyatike bhavasmiṃ
          Te khīṇabijā aviruḷhicchandā
          Nibbanti dhīrā yathā yam padīpo
          Idam pi saṅghe ratanaṃ paṇītaṃ
          Etena saccena suvatthi hotu!

15.     Yānīdha bhūtani samāgatāni
          Bhummāni vā yāni va antalikkhe
          Tathāgataṃ devamanussapūjitaṃ
          Buddhaṃ namassāma suvatthi hotu!

16.     Yānīdha bhūtani samāgatāni
          Bhummāni vā yāni va antalikkhe
          Tathāgataṃ devamanussapūjitaṃ
          Dhammaṃ namassāma suvatthi hotu!

17.     Yanīdha bhūtani samāgatāni
          Bhummāni vā yāni va antalikkhe
          Tathāgataṃ devamanussapūjitaṃ
          Saṅgham namassāma suvatthi hotu!